ଭାବନାଗୁଟେ
@@ଆଶୁତୋଷ ମେହେର
ପାଏନ୍ ବୁନ୍ଦେ ବୁନ୍ଦେ ପଡି
ମାଏଟ୍ ଯେନତା ବୁତରି ଯାଏସି,
ଶୁଖା ଘାସଲତା ବି କଅଁଳି ଯାଏସନ;
ଝଡି ପଡିଲା ଦରମରା ବିଜା ବି
ମଏଟ୍ ଫଟେଇ
ଦୁଇପତର ମେଲିଦେସି ।।
ହେନତା ତୋର ମନର ମାଏଟ୍ କେ
ଥୁପେ ଥୁପେ ଭଲ କଥାଥି
ଭିଜେଇ ଦେ,ଦେଖବୁ
ପେରେମଭାବ ତୋର ମନେ ଭରିଯିବା,
ରାଗବଇରାଗ ସରି ଯିବା
ଆଉର୍ ମନଭତରୁ
ପଝରିଯିବା ସେନେହର ଝରଟେ
ସଭିକେଁ ଭିଜେଇ ଭିଜେଇ
ହସି ଆଉର କନ୍ଦେଇ କରି ବି ।।
***ଇନେ ସରଲା*****
ମୋର_ସମଲପୁରୀ_କବିତା
।। ଜନ୍ମାଷ୍ଟମୀ ।।
@ଆଶୁତୋଷ ମେହେର
ଇ ଦିନ ଯିଏ
ଜନମ୍ ନେଇଥିଲା
ସେ ପରେ
ବଢେ ଗୁଟେ ଲବାର କେ
ଦମନ କରିଥିଲା ।
ଆଜି ତୋର ମନେ
ହେନତା ବଢେ ବଢେ
ସୁନ୍ଦର ଭାବନା ସବୁ
ଭରି ଯାଉ,
ଆଉର ତୋର ଜୀବନୁଁ
ସବୁ କଳଂକ କାଲିମାକେ
ଧୁଇ ଦେଇ ସାଫ କରିଦେଉ।
**ଇଠାନେ ସରଲା**
।। ନୂଆଁଖାଇ ର ଗୀତ ।।
ଆଶୁତୋଷ ମେହେର
।।ଏକ।।
ମାଁ ଗୋ ମାଁ
ତୋର ପାଦପଦମେଁ ଲାଗି କରୁଛୁଁ ନୂଆଁ,
ପନତ ତଲେ ଢାଁକି ରଖବୁ
ସୁଖେ ଦୁଖେ ଆଶୀଷଦେଇ,
ସାହା ହେଇ,ବରଷୁ ଥିବୁ ଗୋ ଆହା ।।
।। ଦୁଇ ।।
ନୂଆଁଖାଇଥି ହେଉଛେ ବନା
ତୁନ୍ ତରକାରୀ ପିଠାପନା,
ଆମ୍ବିଲ ଲେଥା କରଡିଭଜା
ଗହଗହ ଘର ହେଇଛେ ସଜା,
ଇଟା ସୁଖ ବାଣ୍ଟାବାର ବେଲା
ମାଁ ର ଗୁଡିଁଥି ଲାଗିଛେ ମେଲା ।।
।। ତିନ ।।
ନୂଆଁଖାଇ ପରେ ଆମର
ହସର ଖୁସିର ପରବ,
ଇଠାନୁ କହ ଅଛେ କେନଟା
ଅମୁଲମୁଲ୍ ଦରବ ?
ହସଖୁସି ବାଣ୍ଟ ଭୁଗାଭୁଗା
ପାଏବ କେତେ ମଜା,
ହସର ମାଡେ ମାଏଟ ହସବା
ଦୁଃଖ ନୁଁ ସୁଖ ମାରବା ଗଜା ।।
* * ଇଠାନେ ସରଲା * *
