ସମଲପୁରୀ କବିତା**ହସର ଖୁସିର ଧାରେ**
ଆଶୁତୋଷ ମେହେର
ଉସତ ମନେ କହେଲେ ପଦେ
ଲାଗସି ବଢିଆ କେତେ
ଉଠେଁ ଲାଗଲେ ହସର ଧାରେ
ଦିଶିସି ସୁନ୍ଦର ସତେ ।
ହସଲା ମୁହୁଁ ଦାଉ ଦାଭ ଯେ
ବାଟୁଁଥିସି କେତେ ହସ
ସଭେଁ ତାର ଯେ ସାଂଗ ସରସା
ହେଇ ଯାଏସନ ବସ ।
ଧାରଟେ ହସ ବାଣ୍ଟିବାଣ୍ଟି ଯେ
ବନମାଁ ସାଗର ପରେ,
ବିନା ପଏସା ବାଣ୍ଟମାଁ ଚାଲ
ହସର ଖୁସିର ଧାରେ ।।
**ସମାପ୍ତ**
ସମଲପୁରି କବିତା**ମିଠା କଥା ପଦେ**
*****ଆଶୁତୋଷ ମେହେର
ରସଗୁଲା ରସେ ଜିଭ ସିନା ମିଠା
ମିଠା ଲାଗସି ଫଳ
କଥାପଦକର ମିଠାପନ ଆଗେ
ସଭେଁ ହେସନ ତଳ ।
ଜିଭର ମିଠା ଟା ଢୁକି ଦେଲା ଖଁଡି
ଯାଏସି ସରି ପରେ
ମଧୁର କଥାର ମିଠାପନଟା ସେ
କେଭେଁ ଯେ ନାଇଁ ସରେ ।
ମିଠା ମିଠା କଥା କହେଁମା ଯେ ସଭେଁ
ଦୁନିଆଁ ହେବା ମଧୁର
ଦୁନିଆଁ ଜିତମାଁ ମିଠା କଥା ପଦେ
କହି ପାରଲେ ଜରୁର ।
**ସମାପ୍ତ**
